ᓂᕿᖃᑦᓯᐊᕆᐊᖃᕐᓂᕐᒧᑦ ᐊᑭᑦᓯᕋᐅᑎᖃᕐᓂᖅ ᑭᒃᑯᓕᒫᕐᓄᑦ.
ᓂᕿᑭᓪᓕᐅᕐᓂᖅ ᐃᓄᐃᑦ ᓄᓇᖓᓐᓂ ᐅᑭᐅᖅᑕᖅᑐᒥᓪᓗ ᓄᓇᓕᓐᓂ ᐅᓗᕆᐊᓇᖅᑐᒧᑦ ᑎᑭᐅᑎᓯᒪᓕᖅᑐᖅ ᓄᕙᒡᔪᐊᕐᓇᖅ-19ᓗ ᐱᐅᙱᒃᑲᓐᓂᖅᑎᑦᓯᓯᒪᓪᓗᓂ.
79% ᓄᑕᖅᑲᑦ ᓄᓇᕗᒻᒥ ᓂᕿᑭᓪᓗᐅᐸᑦᑐᓂ ᐊᖏᕐᕋᓖᑦ.
(ᓇᑭᙶᕐᓂᖓ: ᓂᕿᑭᓪᓗᐅᕐᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ: ᕿᒥᕈᒋᐊᕈᑎᖃᕐᓂᖅ)
ᐃᓘᓐᓇᑕ ᓂᕿᖃᑦᓯᐊᕈᓐᓇᕆᐊᖃᖅᑐᒍᑦ. ᑖᓐᓇ ᐃᓘᓐᓇᑕ ᐅᔾᔨᕈᓱᑦᑎᑦᓯᒋᐊᕐᓂᖅ ᓂᑯᕐᕋᖃᑎᖃᖅᑐᖅ ᑭᒃᑯᓕᒫᕐᓂᒃ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᖏᑦ ᑲᓇᑕᒥ ᐃᓚᐅᔪᖏᓐᓂᒃ ᓄᓇᓕᖏᓐᓂᓪᓗ ᑐᑦᓯᕋᐅᑎᖃᖅᑎᓪᓗᒋᑦ ᐱᐅᓯᒋᐊᖅᑕᐅᖁᓪᓗᒍ ᓂᕿᓕᕆᖃᑦᑕᕐᓂᖅ. ᐅᑭᐅᖅᑕᖅᑐᒥᐅᑕᕐᓂᒃ, ᓄᓇᖃᖅᑳᖅᓯᒪᔪᐃᑦ ᓄᓇᓕᖏᑦ ᐅᓗᕆᐊᓇᖅᑐᒦᓐᓂᖅᓴᐅᔪᑦ ᓂᕿᑭᓪᓕᐅᖃᑦᑕᕐᓂᕐᒧᑦ. ᐃᑲᔪᕆᑦ ᐅᔾᔨᕈᓱᑦᑎᑦᓯᒋᐊᕐᓂᕐᒥᒃ ᐅᑭᐅᖅᑕᖅᑐᒥ ᓂᕿᑭᓪᓕᐅᖃᑦᑕᕐᓂᖓᑕ ᒐᕙᒪᑐᖃᒃᑯᓪᓗ ᐃᑲᔪᕈᑎᑦᓴᓂᒃ ᖃᓄᖅᑑᕈᑎᖃᖁᓪᓗᒋᑦ ᐃᓄᓐᓄᑦ ᓄᓇᖃᖅᑐᓄᓪᓗ ᓯᕗᓕᖅᑕᐅᔪᓂᒃ.
ᑳᑦᑐᑦ ᐊᑭᑦᓯᕋᕐᓂᕐᒧᑦ
ᐃᓘᓐᓇᑕ ᑐᑭᖃᖅᑐᖅ “ᐊᑐᓂ ᐅᕙᒍᑦ” ᐃᓄᒃᑎᑐᑦ - ᓲᕐᓗ
“ ᐊᑐᓂ ᐅᕙᒍᑦ ᓂᕿᑭᓪᓕᐅᕆᐊᖃᙱᓚᒍᑦ”
ᐃᓘᓐᓇᑲ ᐅᔾᔨᕈᓱᑦᑎᑦᓯᒋᐊᕐᓂᖅ ᓂᕿᑭᓪᓕᐅᙱᓐᓂᕐᒧᑦ ᓄᓇᕗᒻᒥ ᐅᑭᐅᖅᑕᖅᑐᒥᓗ ᓄᓇᓕᓐᓂ ᐱᒋᐊᖅᓯᒪᔪᖅ ᑲᔪᓯᑎᑕᐅᓂᖓ ᐱᖁᓯᕗᖔᕈᑎᐅᓯᒪᔪᖅ ᑭᒃᑯᓕᒫᕐᓄᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᑦ ᑲᓇᑕᒥᒃᑯᑦ (PSAC) 2018ᒥ ᑲᓇᑕᓕᒫᕐᒥ ᑲᑎᒪᓂᖃᖅᑎᓪᓗᒋᑦ ᐃᑲᔪᖅᑐᐃᓪᓗᑎᑦ ᑭᒃᑯᓕᒫᕐᓄᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᖏᑦ ᑲᓇᑕᒥᒃᑯᓐᓄ ᐃᓚᐅᔪᑦ ᓄᓇᓕᖏᓪᓗ. ᐱᖁᔨᕗᖔᕈᑎ ᑐᑦᓯᕋᐅᑎᖃᓚᐅᖅᑐᖅ ᑭᒃᑯᓕᒫᕐᓄᑦ ᑐᑭᑖᖅᑎᐅᔪᓂᒃ ᐊᑐᐃᓐᓇᖃᕐᓂᖅᓴᐅᖁᓪᓗᒋᑦ ᐱᒍᓐᓇᕐᓗᑎᑦ ᓂᕿᑐᐃᓐᓇᕐᓂᒃ ᐃᓄᐃᑦ ᓂᕿᒋᕙᑦᑕᖏᓐᓂᒃ, ᓂᖀᓪᓗ ᓂᐅᕕᕐᕕᓐᓂ ᐊᑭᑐᙱᓂᖅᓴᐅᓕᕐᓗᑎᑦ ᐅᑭᐅᖅᑕᖅᑐᓕᒫᕐᒥ.
ᑖᓐᓇ ᐃᓘᓐᓇᑕ ᐅᔾᔨᕈᓱᑦᑎᑦᓯᒋᐊᕐᓂᖅ ᖃᐃᖅᑯᔨᕗᖅ ᑭᒃᑯᓕᒫᕐᓄᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᑦ ᑲᓇᑕᒥᒃᑯᑦ ᐃᓚᐅᔪᓂᒃ ᓄᓇᓕᖏᓐᓂᓪᓗ ᓴᖅᑭᔮᖅᑎᓪᓗᒋᑦ ᓂᕿᑭᓪᓕᐅᕐᓂᐅᕙᑦᑐᖅ ᑕᒪᓐᓇᓗ ᐅᔾᔨᕈᓱᑦᑎᑦᓯᒋᐊᕐᓂᖅ ᖃᓄᐃᓕᐅᕆᐊᕐᓂᓕᕐᓗᓂ.
ᐃᓕᒋᐊᕆᑦ ᖃᓄᖅ ᐃᑲᔪᕈᓐᓇᕐᒪᖔᖅᐱᑦ.
ᓂᕿᑭᓪᓕᐅᕐᓂᖅ ᓄᓇᕗᒻᒥ ᐅᑭᐅᖅᑕᖅᑐᒥᓪᓗ ᓄᓇᓕᓐᓂ
76% ᐃᓄᐃᑦ ᐊᕐᕌᒍᓖᑦ 15ᓂᒃ ᐅᖓᑖᓂᓪᓗ ᓂᕿᑭᓪᓕᐅᖅᐸᑦᑐᑦ.
ᐃᓄᐃᑦ ᓇᓕᒧᒌᙱᑦᑐᒥᒃ ᐊᑦᑐᖅᑕᐅᓂᖃᖅᓯᒪᓂᖅᓴᐅᕙᑦᑐᑦ ᓂᕿᑭᓪᓕᐅᕐᓂᕐᒧᑦ 85%ᖑᓪᓗᑎᑦ ᓄᓇᕗᒻᒥ ᐃᓄᓕᒫᖏᓐᓂ.
(ᓇᑭᙶᕐᓂᖓ: ᓈᓴᐃᔩᑦ ᑲᓇᑕᒥ)
ᐱᔾᔪᑕᐅᔪᑦ
ᐱᔾᔪᑕᐅᓂᖏᑦ ᐅᑭᐅᖅᑕᖅᑐᒥ ᓂᕿᑭᓪᓕᐅᕐᓂᕐᒧᑦ ᐊᒥᓲᓕᖅᑲᖓᔪᑦ ᐃᓗᓕᖃᖅᑐᐹᓘᓪᓗᓂᓪᓗ. ᓯᓚᑎᖏᓐᓃᖔᖅᓯᒪᔪᓄᑦ ᐊᐅᓚᑕᐅᓂᒃᑯᑦ ᓇᑦᓴᖅᓯᒪᔪᑦ ᓄᑖᕐᓂᒃ ᖃᓂᒻᒪᓯᕐᓂᒃ ᐊᑐᖅᑕᐅᕙᓪᓕᐊᓂᖓᓪᓗ ᑕᕆᐅᑉ ᐊᑭᐊᓂᒥᐅᑉ ᐱᐅᓯᖏᑦ, ᐱᔾᔪᑕᐅᓯᒪᔪᖅ ᐃᓄᐃᓴᓪᓕᒋᐊᖅᓯᒪᓂᖏᓐᓄᑦ ᐃᓄᐃᑦ ᐃᓄᓕᒫᖏᓐᓂ ᓴᙲᓪᓕᑎᑦᓯᓯᒪᓪᓗᓪᓗ ᐊᑦᑐᐊᖃᑎᒌᓐᓂᖏᓐᓂᒃ ᐱᖅᑯᓯᑐᖃᐃᓪᓗ ᐊᓐᓇᐅᒪᒐᓱᐊᕐᓂᒃᑯᓪᓗ ᐱᐅᓯᐅᕙᑦᑐᓂᒃ.
ᐅᓪᓗᒥ, ᐊᑦᑐᐃᓂᖃᓪᓚᕆᑦᓯᒪᓂᖓ ᓯᓚᑎᒥᓐᓃᖔᖅᑐᓄᑦ ᐊᐅᓚᑕᐅᓂᕐᒧᑦ ᐅᑭᐅᖅᑕᖅᑐᒥ ᓂᕿᑭᓪᓕᐅᕈᑎᓄᑦ ᐱᒋᐊᓪᓚᑦᑎᑕᐅᔪᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ, ᐊᖏᕐᕋᒥᐅᑕᐅᖃᑎᒌᑦᑐᑦ ᑮᓇᐅᔭᐃᓐᓂᐊᖅᐸᓐᓂᖏᓐᓄᑦ ᓈᒻᒪᙱᑑᑎᐅᓂᖏᓐᓄᓪᓗ ᓂᖀᑦ ᓯᐊᒻᒪᑎᖅᑕᐅᕙᓐᓂᖏᓐᓄᑦ ᐋᖅᑭᑕᐅᒪᔪᓂ.
ᐊᑦᑐᐃᓯᒪᓂᖓ ᓯᓚᑎᒥᓐᓃᖔᖅᑐᓄᑦ ᐊᐅᓚᑕᐅᓂᕐᒧᑦ
ᐃᓄᐃᑦ ᓄᓇᖃᖅᓯᒪᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᕐᕌᒍᐃᑦ 4,000 ᐅᖓᑖᓄᑦ ᑕᑎᖃᖃᑦᑕᖅᑐᑎᓪᓗ ᐊᕙᑎᒥᓐᓂ ᓂᕿᒧᑦ, ᐊᓐᓄᕌᑦᓴᓄᑦ ᐃᓪᓗᖃᕐᓂᕐᒧᓪᓗ. ᐊᕐᕌᒍᖏᑦ 1950ᖏᓐᓂ, ᒐᕙᒪᒃᑯᓐᓄᑦ ᐊᑐᖅᑎᑕᐅᔪᑦ ᐱᐅᓯᑐᖃᕐᒥᓂ ᓴᒃᑯᐃᑎᑦᓯᒋᐊᖅᓯᒪᓂᖏᑦ ᐃᓄᓐᓂᒃ ᐱᐅᓯᑐᖃᖏᓐᓂᒃ ᐊᑐᖔᓕᖅᑐ ᐃᓕᑕᕐᓇᙱᑦᑐᒥᒃ “ᒫᓐᓇᕐᓂᑕᐅᔪᒥᒃ” ᐃᓅᓯᕐᒥᒃ.
ᐊᑐᐊᒐᓕᐊᖑᓯᒪᔪᑦ ᓲᕐᓗ ᓄᓇᖃᖅᑳᖅᓯᒪᔪᐃᑦ ᐃᓕᓐᓂᐊᕆᐊᖅᑎᑕᐅᓯᒪᓂᖏᓐᓄᑦ ᑭᖑᕚᕇᑦᑐᓂᒃ ᔭᒐᐃᑎᑦᓯᔨᒪᔪᑦ ᐊᓯᕙᕐᓂᕐᒥᒃ ᖃᐅᔨᒪᔭᑐᖃᖏᓐᓂᒃ. ᐊᓯᖏᑦ ᐊᑐᐊᒐᐃᑦ ᐃᓚᐅᑎᑦᓯᓯᒪᙱᑦᑐᑦ ᓄᓇᖃᖅᑳᖅᓯᒪᔪᐃᑦ ᖃᐅᔨᒪᓂᖏᓐᓂᒃ, ᑭᓪᓕᖃᖅᑎᑕᐅᓯᒪᓪᓗᑎᑦ ᓄᓇᖃᖅᑳᖅᓯᒪᔪᐃᑦ ᐊᓯᕙᖅᑏᑦ ᑮᓇᐅᔭᓕᐅᕈᓐᓇᕐᓂᖏᑦ, ᐊᑐᓕᖅᑎᑦᓯᓯᒪᓪᓗᑎᓪᓗ ᐊᑑᑎᖃᑦᓯᐊᙱᑦᑐᓂᒃ ᐊᓐᓇᐅᒪᔾᔪᑎᑦᓴᐅᙱᑦᑐᓂᓪᓗ ᖃᓪᓗᓈᓕᖅᑕᓂᒃ ᓂᕿᓂᒃ. ᐊᑦᑐᐃᓂᖃᖅᓯᒪᓂᖓ ᓯᓚᑎᒥᓐᓃᖔᖅᑐᓄᑦ ᐊᐅᓚᑕᐅᓂᖅ ᐱᓂᓪᓗᓐᓂᖃᖅᐸᓪᓕᐊᖏᓐᓇᖅᑐᖅ ᐅᑭᐅᖅᑕᖅᑐᒥᐅᓂᒃ ᓄᓇᖃᖅᑳᖅᓯᒪᔪᐃᓪᓗ ᓂᕿᖃᑦᓯᐊᕈᓐᓇᕐᓂᖏᓐᓂᒃ.
ᓂᕿᑭᓪᓕᐅᕐᓂᖅ ᐱᔾᔪᑕᐅᓪᓚᕆᑉᐸᒻᒥᔪᖅ ᐃᓅᓯᕐᒥᓐᓂ ᑭᐱᓯᖃᑦᑕᕐᓂᕐᒧᑦ ᓄᓇᕗᒻᒥ, ᒪᒃᑯᑦᑐᐃᑦ ᐊᖑᑏᑦ 40ᕋᖅᑐᒍ ᐊᒥᓱᐊᖅᑎᖅᑐᒥᒃ ᑐᖁᓂᐅᓴᑐᐃᓐᓇᖅᑐᑦ ᐃᓅᓯᕐᒥᓐᓂ ᑭᐱᓯᓂᒃᑯᑦ ᓴᓂᖏᑦᑕ ᐅᑭᐅᖃᑎᖏᑦ ᑲᓇᑕᓕᒫᕐᒥ, ᐅᖃᖅᑕᐅᓯᒪᓪᓗᓂ ᖃᐅᔨᓴᕈᑎᐅᕋᑖᓚᐅᖅᑐᒥ ᒥᒡᒋᐅᓪ ᓯᓚᑦᑐᓴᕐᕕᕐᔪᐊᖓᓐᓂ.
ᓯᓚᐅᑉ ᐊᓯᔾᔨᐸᓪᓕᐊᓂᖓ
ᐊᓐᓇᐅᒪᓇᓱᐊᕐᓂᒃᑯᑦ ᐊᓯᕙᖃᑦᑕᕐᓂᖅ ᐃᓕᖅᑯᓯᑐᖃᖅᑎᒍᓪᓗ ᓂᕿᓂᒃ ᐊᒥᖅᑳᖃᑦᑕᑦᑕᕐᓂᖅ ᐃᓄᓐᓄᑦ ᑐᙵᕕᒋᔭᐅᓪᓚᕆᑦᑐᖅ. ᑭᓯᐊᓂᓕ, ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓂᕐᓗᓐᓂᖃᖅᑐᖅ ᐃᓄᓐᓂᒃ ᐅᑭᐅᖅᑕᖅᑐᒥᓪᓗ ᓂᕿᖃᑦᓯᐊᕆᐊᖃᕐᓂᕐᒥ. ᐊᓯᔾᔨᕐᓂᐅᔪᑦ ᐊᕙᑎᒥ ᐊᑦᑐᐃᓂᖃᖅᓯᒪᔪᖅ ᐊᑐᐃᓐᓇᐅᕙᓐᓂᖏᓐᓂᒃ ᓂᕐᔪᑏᑦ, ᓯᓚᐅᓪᓗ ᐅᖅᑰᓯᕙᓪᓕᐊᓂᖓ ᐊᐳᑎᖃᑦᓯᐊᙱᓐᓂᕐᓗ ᐊᓯᕙᕐᓂᕐᒥᒃ ᐱᔭᕆᐊᑐᓂᖅᓴᐅᑎᑦᓯᔪᖅ. ᐱᐅᙱᓂᖅᓴᐅᒻᒥᔪᕐᓕ, ᓄᓇᕐᔪᐊᓕᒫᕐᒥ ᓱᕈᕐᓇᖅᑐᑦ ᑲᑎᑉᐸᓪᓕᐊᓂᖃᖅᑐᖅ ᑎᑭᐅᑎᕙᑦᑐᓂᓪᓗ ᓂᕿᑐᐃᓐᓇᕐᓄᑦ ᐅᑭᐅᖅᑕᖅᑐᒥ.
ᐊᔪᖅᓴᕐᓂᖅ
ᒫᓐᓇᐅᔪᖅ ᓂᕿᑭᓪᓕᐅᕐᓂᕐᒧᑦ ᐊᑐᐊᒐᐃᑦ ᑕᑯᓐᓇᓗᐊᕐᓂᖃᖅᐸᑦᑐᑦ ᐊᑭᖏᓐᓂᒃ ᓂᖀᑦ. ᑭᓯᐊᓂᓕ, ᓄᓇᕗᒻᒥᐅᑕᖅ ᑮᓇᐅᔭᖅᑐᖅᐸᑦᑐᖅ ᑎᑭᐅᑎᑲᓴᑦᑐᓂᒃ ᓇᑉᐸᖓᑕ ᓇᑉᐸᒃᑲᓐᓂᖓᓂᒃ ᑮᓇᐅᔭᓕᐊᕐᒥᓂᒃ ᓂᕆᒃᑲᐅᑎᒋᓪᓗᒋᑦ ᓇᒻᒥᓂᖅ. ᑕᐃᒪᐃᑦᑎᓪᓗᒍ, ᐃᓕᓐᓂᐊᕆᐊᒃᑲᓐᓂᕈᑎᑦᓴᐃᑦ ᐃᖅᑲᓇᐃᔭᕐᓂᕐᒧᓪᓗ ᐱᕕᑦᓴᖃᖅᑎᑕᐅᓃᑦ ᐅᑭᐅᖅᑕᖅᑐᒥ ᑐᑭᖃᖅᑐᖅ ᑕᑎᖃᕆᐊᖃᖅᐸᓐᓂᕐᒥ ᐋᖅᑭᑦᓯᐊᖅᓯᒪᙱᑦᑐᓂᒃ ᓂᕆᓄᑦ ᐊᑭᑭᓪᓕᒋᐊᕈᑎᓄᑦ ᐱᓕᕆᐊᑦᓴᐃᑦ.
ᓂᕿᓄᑦ ᐋᖅᑭᑦᓯᒪᑎᑕᐅᔪᑦ
ᒫᓐᓇᒃᑯᑦ ᓂᕿᓄᑦ ᐋᖅᑭᑦᓯᒪᑎᑕᐅᔪᑦ ᐱᔨᑦᓯᕋᙱᓗᐊᖅᑐᑦ ᐅᑭᐅᖅᑕᖅᑐᒥᐅᓂᒃ ᐊᓐᓇᐅᒪᔾᔪᑎᐅᒍᓐᓇᙱᑦᑐᑦ. ᓂᖀᑦ ᑎᑭᐅᔾᔭᐅᒋᐊᖃᖅᐸᑦᑐᑦ ᐅᑭᐅᖅᑕᖅᑐᒥ ᓄᓇᓕᖏᓐᓄᑦ ᖃᓪᓗᓈᓃᖔᖅᑐᓂᒃ, ᐱᔾᔪᑕᐅᓚᕿᓪᓗᑎᑦ ᐊᑭᑐᓂᖏᑦ ᑎᑭᑎᑕᐅᓂᖏᓐᓄᑦ. ᑕᑎᖃᖃᑦᑕᕐᓂᖅ ᓯᓚᑎᑦᑎᓐᓃᖔᖅᑐᓂᒃ ᓂᕿᖃᕐᓂᕐᒧᑦ ᐋᖅᑭᑦᓯᒪᑎᑕᐅᔪᓂᒃ ᖁᒡᕙᕆᐊᖅᐸᒻᒥᔪᖅ ᒪᓕᑦᑐᓂ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ.
ᖃᓄᖅ ᑎᑭᐅᑎᒍᓐᓇᕐᓂᖅ ᐅᑭᐅᖅᑕᖅᑐᒥ ᓂᕿᖃᑦᓯᐊᕐᓂᕐᒧᑦ
ᐃᑲᔪᖅᓯᒍᑕᐅᓂᖅᐸᐅᔪᖅ ᒐᕙᒪᑐᖃᒃᑯᓐᓄᑦ ᐱᓕᕆᐊᖑᖁᓪᓗᒍ ᐅᑭᐅᖅᑕᖅᑐᒥ ᓂᕿᑭᓪᓕᐅᕐᓂᖅ (ᐅᕿᐅᖅᑕᖅᑐᒥ ᓂᕿᓄᑦ ᐊᑭᑭᓪᓕᒋᐊᕈᑏᑦ ᓂᕿᓄᑦ ᐱᓕᕆᐊᑦᓴᖅ) ᓈᒻᒪᙱᒋᐊᖓ ᐅᖃᐅᓯᐅᓪᓚᕆᖃᑦᑕᖅᓯᒪᔪᖅ ᐋᖅᑭᑦᓯᐊᖅᓯᒪᙱᒋᐊᖓ, ᐊᓐᓇᐅᒪᔾᔪᑎᐅᒍᓐᓇᙱᒋᐊᖓ ᐃᑲᔪᖅᓯᒍᑕᐅᓗᓂ ᐃᓄᐃᑦ ᓇᒻᒥᓂᖅᓱᕈᒪᓂᖓᓄᑦ.
ᐊᕕᑦᑐᖅᓯᒪᖃᑎᒌᑦᑐᑦ ᐊᔾᔨᒌᙱᑦᑑᑎᓂᒃ ᐃᓗᓕᖃᐅᑦᑎᓪᓗᒋᑦ, ᐋᖅᑭᒋᐊᕈᑎᑦᓴᐃᑦ ᐅᑭᐅᖅᑕᖅᑐᒥ ᓂᕿᑭᓪᓕᐅᕐᓂᕐᒧᑦ ᐃᒪᐃᑦᑑᒋᐊᓖᑦ: ᓄᓇᖃᖅᑳᖅᓯᒪᔪᓄᑦ ᓄᓇᖃᖅᑐᓄᓪᓗ ᓯᕗᓕᖅᑕᐅᓗᑎᑦ; ᑐᓴᐅᒪᑎᑕᐅᓗᑎᑦ ᓄᓇᖃᖅᑳᖅᓯᒪᔪᐃᑦ ᖃᐅᔨᒪᓂᖏᓐᓄᑦ; ᐃᑲᔪᖅᓯᒍᓐᓇᕐᓗᑎᓪᓗ ᓄᓇᓕᓐᓂ ᐱᕙᓪᓕᐊᔪᓕᕆᓂᕐᒥ ᑮᓇᐅᔭᑎᒍᑦ. ᐋᖅᑭᒋᐊᕈᑎᑦᓴᐃᑦ ᓴᙱᓕᕆᐊᖅᑕᐅᓗᓂ ᐅᑭᐅᖅᑕᖅᑐᒥ ᓂᕿᖃᑦᓯᐊᕆᐊᖃᕐᓂᖅ ᐃᓱᒪᒋᔭᖃᕆᐊᓖᑦ ᐃᓄᐃᑦ ᐱᓐᓇᕆᔭᖏᓐᓂᒃ ᐊᕕᑦᑐᖅᓯᒪᖃᑎᒌᑦᑐᓂ — ᐊᒻᒪᓗ ᐃᒪᐃᑦᑑᒋᐊᖃᙱᑦᑐᖅ ᐊᑕᐅᓯᖅ ᐃᓘᓐᓇᖏᓐᓅᖓᔫᓗᓂ.
ᓂᕿᑐᐃᓐᓇᐃᑦ
ᐊᒥᓱᑦ ᐃᓄᐃᑦ ᐊᓯᕙᖅᐸᑦᑐᑦ ᓂᕿᑦᓴᖏᓐᓂᒃ ᐃᓚᖏᑦᑕ. ᐆᒪᔪᐃᑦ ᓲᕐᓗ ᑐᑦᑐᐃᑦ, ᐊᕿᒡᒌᑦ, ᐃᖃᓗᐃᑦ ᓇᑦᓰᓪᓗ ᓂᕿᒋᔭᐅᓪᓚᕆᑉᐸᑦᑐᑦ ᐅᑭᐅᖅᑕᖅᑐᒥᐅᓄᑦ. ᐊᓯᕙᕐᓂᖅ ᐊᑦᑐᐊᓂᖃᓪᓚᕆᒻᒥᔪᖅ ᓂᕿᓂᒃ ᐊᒥᖅᑳᖃᑦᑕᕐᓂᕐᒥᒃ, ᐱᒻᒪᕆᐅᓪᓗᓂᓪᓗ ᐃᓪᓗᒥᐅᑕᐅᖃᑎᒌᑦᑐᑦ ᐱᒋᐊᖃᖅᑐᓄᑦ - ᓲᕐᓗ ᐃᓐᓇᑐᖃᐃᑦ ᑕᐃᒃᑯᐊᓘᓐᓃᑦ ᑮᓇᐅᔾᔭᓴᓗᐊᙱᑦᑐᑦ.
ᒪᑭᑕᒋᐊᕈᓐᓇᕐᓂᖅ
ᐃᓄᑦᓄᑦ ᓯᕗᓕᖅᑕᐅᔪᑦ ᓄᓇᓕᓐᓂᓗ ᐱᒋᐊᖅᑎᑕᐅᓯᒪᔪᑦ ᐱᒻᒪᕆᐅᔪᑦ ᓂᕿᖃᑦᓯᐊᕆᐊᖃᕐᓂᕐᒧᑦ ᐅᑭᐅᖅᑕᖅᑐᒥ. ᑖᒃᑯᐊ ᐱᓕᕆᐊᑦᓴᐃᑦ ᐊᓯᕙᕐᓂᕐᒥ ᐊᑐᐃᓐᓇᐅᓂᖅᓴᐅᑎᑦᓯᕙᑦᑐᑦ, ᓴᖅᑭᔮᖅᑎᑦᓯᒋᐊᖅᐸᑦᑐᓂᓪᓗ ᖃᐅᔨᒪᔭᑐᖃᐅᔪᓂᒃ ᐊᓯᕙᕐᓂᕐᒧᑦ ᓂᖀᓪᓗ ᐊᒥᖅᑳᖃᑎᒌᓐᓂᕐᒧᑦ ᐋᖅᑭᑦᓯᒪᑎᑕᐅᔪᑦ, ᐃᑲᔪᖅᑐᐃᔪᑦ ᓄᓇᓕᓐᓂ ᖃᔪᖅᑐᕐᕕᓐᓂ, ᐱᕈᖅᓴᐃᒍᓐᓇᕐᓂᕐᓗ ᓂᕿᑦᓴᓂᒃ, ᐊᓯᖏᓐᓂᓪᓗ.
ᐊᓯᒃᑲᓐᓂᖏᑦ ᐊᑐᖅᑕᐅᒍᓐᓇᖅᑐᑦ
ᐃᓄᐃᑦ ᑕᐱᕇᑦ ᑲᓇᑕᒥ
ᑲᓇᑕᓕᒫᕐᒥ ᑭᒡᒐᖅᑐᐃᔪᖅ ᑎᒥᖁᑎ ᓴᐳᔾᔨᓪᓗᓂ ᓯᕗᒧᐊᒋᐊᖅᑎᑦᓯᕙᑦᑐᓂᓪᓗ ᐱᔪᓐᓇᐅᑎᖏᓐᓂᒃ ᐊᑐᕈᒪᔭᖏᓐᓂᓪᓗ ᐃᓄᐃᑦ ᑲᓇᑕᒥ.
ᓄᓇᕗᑦ ᓂᕿᖃᑦᓯᐊᕆᐊᖃᕐᓂᕐᒧᑦ ᑲᑐᔾᔨᖃᑎᒌᑦ
ᑲᑐᔾᔨᖃᑎᒌᑦᑐᑦ ᐊᑯᓐᓂᖏᓐᓂ 25 ᓄᓇᓖᑦ ᓄᓇᕗᒻᒥ ᐱᓕᕆᐊᖑᖁᓪᓗᒍ ᐊᕕᑦᑐᖅᓯᒪᖃᑎᒌᑦᑐᓂ ᓂᕿᑭᓪᓕᐅᕐᓂᐅᕙᑦᑐᖅ
ᓂᕆᒃᑲᐃᓂᖅ ᓄᓇᕗᒻᒥ
ᑮᓇᐅᔭᓕᐅᕋᓱᐊᖅᑎᐅᒐᑎᑦ ᑎᒥᐅᔪᑦ ᐅᔾᔨᕈᓱᒋᐊᖅᑎᑦᓯᕙᑦᑐᑦ ᓂᕿᑭᓪᓕᐅᕐᓂᐅᔪᒥ ᐊᑦᓱᕈᕐᓇᕐᓂᖓᓂᓪᓗ ᐊᓐᓇᐅᒪᒐᓱᐊᕐᓄᓂ ᓄᓇᕗᒻᒥ
ᓂᕿᖃᑦᓯᐊᕐᓂᖅ ᑲᓇᑕ
ᑲᑐᔾᔨᖃᑎᒌᑦᑐᑦ ᑎᒥᐅᔪᑦ ᐃᓄᑐᐃᓐᓇᐃᓪᓗ ᑲᓇᑕᒥ ᐱᓕᕆᐊᖃᖅᑐᑦ ᓯᕗᒧᐊᒋᐊᖅᑕᐅᖁᓪᓗᒍ ᓂᕿᖃᑦᓯᐊᕆᐊᖃᕐᓂᖅ ᓂᕿᑎᒍᓪᓗ ᓇᒻᒥᓂᖅᓱᕈᓐᓇᕐᓂᖅ
ᑐᑭᓯᓴᖅᑏᑦ PROOF
ᑐᑭᓯᓴᖅᑏᑦ ᐊᔾᔨᒌᙱᑦᑑᑎᓂᒃ ᐱᓕᕆᐊᖃᑦᑐᑦ ᖃᐅᔨᓴᕈᑎᖃᖅᐸᑦᑐᑦ ᐃᓪᓗᒥᐅᑕᐅᖃᑎᒌᑦᑐᑦ ᓂᕿᑭᓪᓕᐅᕐᓂᕆᕙᑦᑕᖏᓐᓂᒃ ᑲᓇᑕᒥ
ᐃᑲᔪᕆᑦ ᐃᓱᓕᑦᑎᓪᓗᒍ ᓂᕿᑭᓪᓕᐅᕐᓂᖅ ᐃᓄᐃᑦ ᓄᓇᖓᓐᓂ ᐅᑭᐅᖅᑕᖅᑐᒥᓪᓗ ᓄᓇᓕᓐᓂ.
ᑎᑭᐅᑎᒍᓐᓇᖁᓪᓗᑕ ᐊᓯᔾᔨᕐᓂᐅᓪᓚᕆᑦᑐᒧᑦ, ᐊᒥᓲᓂᖅᓴᐅᑦ ᑲᓇᑕᒥᐅᑕᑦ ᐅᔾᔨᕈᓱᓕᕆᐊᖃᖅᑐᑦ ᓂᕿᑭᓪᓕᐅᕐᓂᐅᕙᑦᑐᒥ ᐅᑭᐅᖅᑕᖅᑐᒥ.
ᐅᓂᒃᑳᕆᒍᒃ ᐅᓂᒃᑳᑦᓴᐃᑦ
ᐊᔾᔨᙳᐊᖅ ᐅᖃᐅᓯᑦᓴᖃᖅᐸᑦᑐᖅ ᐊᒥᓱᕐᔪᐊᕐᓂᒃ. ᑐᓂᓯᒋᑦ ᐊᔾᔨᙳᐊᕐᓂᒃ ᓴᖅᑭᔮᖅᑎᑦᓯᔪᓂᒃ ᖃᓄᐃᑦᑑᓂᖓᓂᒃ ᓂᕿᑭᓪᓕᐅᕐᓂᖅ ᐅᑭᐅᖅᑕᖅᑐᒥ - ᓂᐅᕕᕐᕕᓐᓂ ᓂᖀᑦ ᐊᑭᖏᑦᑕ ᓇᓗᓇᐃᒃᑯᑕᖏᑦ, ᓂᖀᑦ ᐊᑭᖏᑦ ᓂᐱᑎᖅᓯᒪᔪᑦ, ᓂᐅᕕᕈᑎᕕᓂᕐᓄᑦ ᓇᓕᖅᑲᐃᑦ, ᐆᑦᑑᑎᑦᓴᐃᑦ ᖃᓄᑎᒋ $100 ᓂᐅᕕᕈᓐᓇᕐᒪᖔᑦ. ᑕᑯᑎᓪᓗᒋᑦ ᑲᓇᑕᒥᐅᑕᓕᒫᑦ ᖃᓄᐃᑦᑑᒻᒪᖔᑦ ᓂᕿᑭᓪᓕᐅᕐᓂᖅ ᐃᓕᓐᓄᑦ.
ᓯᐊᒻᒪᑦᑎᒍᒃ ᑐᓴᖅᑕᐅᑎᓪᓗᒍ
ᐊᒥᓱᑦ ᑭᒃᑯᑐᐃᓐᓇᐃᑦ ᐃᓚᐅᒃᐸᑕ, ᓂᐱᖁᕐᑐᓂᕐᓴᐅᔪᓐᓇᕐᑐᒍᑦ. ᐱᔪᒪᓂᖃᑐᐊᕈᑦᑕ ᓇᖕᒥᓂᖅ-ᐱᓇᓱᐊᕐᓗᓂ ᓂᕿᓄᑦ ᐊᒻᒪᓗ ᖃᓄᐃᖏᓐᓂᕐᒧᑦ, ᑕᒪᐃᑕ ᐱᓇᓱᐊᕈᑦᑕ ᓂᕿᖃᑦᑎᐊᕐᑐᐃᓐᓇᐅᔪᓐᓇᖁᓪᓗᑕ.
ᓇᕿᓪᓗᒍ ᐱᔪᓐᓇᕐᓂᐊᕐᑕᑎᑦ ᐊᔾᔨᓕᐅᒐᐃᑦ ᐊᑖᓃᑦᑐᑦ ᐊᒻᒪᓗ ᐊᔾᔨᓕᐅᒐᐅᔪᖅ ᐊᔾᔨᖓ ᐊᒻᒪᓗ ᓂᐱᑎᓪᓗᒍ ᐅᖃᐅᓯᕐᑕᖏᑦ ᑕᑯᔭᐅᔪᓐᓇᕐᓂᐊᕐᒪᑕ ᐃᓄᒋᐊᒃᑐᒃᑯᕕᖕᓂᑦ ᖃᕋᓴᐅᔭᑎᒍᑦ:
ᓄᓇᖃᖄᕐᓯᒪᔪᑦ ᐊᒻᒪᓗ ᐅᐊᖕᓇᕐᒥᐅᑦ ᓄᓇᓕᒋᔭᖏᑦ ᓯᕗᓕᐅᕆᐊᖃᓕᕐᑐᑦ ᓴᕿᑎᑦᑎᕙᓪᓕᐊᓗᑎᑦ ᖃᓄᕐᑑᕈᑎᓂᑦ ᓂᕿᖃᑦᑎᐊᖃᑦᑕᖏᓐᓂᕐᒧᑦ.#CdnFoodJustice #Illunnata
ᐃᓘᓐᓇᑕ ᓴᓇᕐᕈᑎᒃᓴᖅ
ᑐᓴᕆᐊᕐᕕᖃᕆᑦ
Public Service Alliance of Canada
233 Gilmour Street,
Ottawa, Ontario, K2P 0P1
1-888-604-PSAC (7722),
info@psac-afpc.com
psacunion.ca
ᐊᔾᔨᙳᐊᖅ ᓴᖅᑭᔮᖅᑎᑕᐅᔪᑦ ᐃᓘᓐᓇᑕ ᐅᔾᔨᕈᓱᒋᐊᖅᑎᑦᓯᓂᕐᒥ ᓚᐃᓴᖃᖅᑐᖅ ᐊᔾᔨᙳᐊᕆᔭᐅᓪᓗᑎᑦ ᓄᓇᓖᑦ ᓄᓇᙳᐊᓪᓗ ᐃᓄᐃᑦ ᓄᓇᖓᓐᓂ ᐅᑭᐅᖅᑕᖅᑐᒥᓪᓗ ᓄᓇᖃᖅᑐᓂ ᑲᓇᑕᒥ.